Facebook Pixel Code

ᑲᐧᑫᐧᑌᐧᐃᓇᓐ ᑲᑭᓇᐧᑫᒋᑲᑌᑭᓐ

English

ᒥᐅᒪ ᐸᑭᑭᓂᑲᓂᒃ ᑲᐅᔑᐱᐃᑲᑌᑭᓐ ᑲᐧᑫᐧᑌᐧᐃᓇᓐ ᑲᑭᓇᐧᑫᒋᑲᑌᑭᓐ ᐃᐃᐧᐁ ᐅᒋ ᑭᑭᑐᐧᐃᓂᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ. ᑲᒥᑲᓇᓐ ᑫᑯᓇᓐ ᑲᓂᑕᑲᐧᑫᐧᑌᓇᓂᐧᐊᒃ ᑲᔦ ᓇᐧᑫᒋᑲᓇᓐ ᐅᐅᒪ ᓂᑕᓄᑭᑕᒪᑫᐧᐃᓂᓇᓐ, ᑲᑲᐧᑫᐧᑌᑕᒪᐧᐃᒡ ᐅᐅᒪ ᒋᐅᒋᐧᐃᒋᑐᑲᐧᐃᒡ ᑲᔦ ᓇᓇᑲᒋᐃᑯᐧᐃᓐ. ᑭᔥᐱᓐ ᑫᑯᓐ ᐧᐃᑲᐧᑫᐧᑌᔭᓐ ᑲᑭᐅᒋ ᑲᐧᑫᐧᑌᓇᓂᐧᐊᓯᓄᒃ ᐱᑭᑭᑐᓐ ᐅᐅᒪ 1-877-507-7301.

ᑲᐅᓇᑌᒃ ᐧᐃᒋᐃᑯᐧᐃᓐ
ᐸᑭᑎᓂᑎᓱᐧᐃᓐ
ᒪᐧᐊᒋᐃᐧᐁᐧᐃᓇᓐ
ᑎᐸᒋᒧᐧᐃᓇᓐ

ᐊᓄᑭᑕᒪᑫᐧᐃᓇᓐ ᑲᐸᒥᓂᑲᑌᑭᓐ:

1. ᑲᓂᑲᓂᐅᓇᒋᑲᑌᓂᒃ ᑫᔑᐱᒥᐧᐃᒋᐊᑲᓂᐧᐃᒡ

2. ᑭᑭᓄᒪᑫᐧᐃᓐ
3. ᒪᔥᑭᑭᐧᐃ ᓇᓇᑕᐧᐃᑭᑫᒥᑯᐧᐃᓐ

ᓇᓇᑲᒋᑐᓐ ᐅᐅᐧᐁ ᐧᐃᓐᑕᒪᑫᐧᐃ ᒪᓯᓇᐃᑲᓐ ᑫᓂᔑᐧᐃᓐᑕᒪᑯᔭᓐ ᒣᐧᑲ ᐊᓂᐅᓇᒋᑲᑌᒃ ᑫᔑᐧᐃᒋᐃᑯᔭᓐ.

ᑲᐧᑫᐧᑌᐧᐃᓐ ᒋᐧᐃᒋᐃᒡ ᐅᑕᑯᓯ

ᐊᐱᓄᒋᔥ ᑭᒋᐊᑯᓯᐧᐃᑲᒥᑯᒃ ᑭᑭᑐᐧᐃᓂᒃ ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ ᓂᐧᔐᒃ ᐸᑲᓐ ᐃᓇᓄᑭᑕᒪᑫᒪᑲᓐ: ᑌᓕ ᑲᑲᓄᔑᐧᐁ ᐊᓄᑭᑕᒪᑫᐧᐃᓇᓐ ᑲᔦ ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ. ᑕᐱᔥᑯ ᐅᓄ ᐃᓇᓄᑭᑕᒪᑫᒪᑲᓄᓐ ᒪᓯᓇᑌᓯᒋᑲᓂᒃ ᐅᒋᐧᐊᐸᒪᑲᓂᐧᐃᐧᐊᒃ ᐅᑕᑯᓯᒃ. ᑲᐧᐃᓐ ᑕᔥ ᑫᒋᐧᐊᒃ ᓂᐧᐊᐸᒪᓯᒥᓐ.

ᑲᐧᑫᐧᑌᐧᐃ ᐧᐃᒋᐃᑯ ᒧᔥᑭᓀᐱᐃᑲᓇᓐ ᑲᑭᒥᑲᓇᓐ ᐅᐅᒪ.

ᑌᓕ ᑲᑲᓄᔑᐧᐁ ᐊᓄᑭᑕᒪᑫᐧᐃᓇᓐ (TMHS)

 

ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ

 

ᐅᐅᒪ ᑌᓕ ᑲᑲᓄᔑᐧᐁ ᐊᓄᑭᑕᒪᑫᐧᐃᓂᒃ (TMHS) ᑲᐃᔑᑲᐧᑫᐧᑌᓇᓂᐧᐊᒃ ᐧᐃᒋᐃᑯᐧᐃᓐ ᑕᑭᐃᔑ ᑲᐧᑫᐧᑌᓇᓂᐧᐊᓐ ᐅᑭᒪᐧᐃᓐ ᑲᑎᐸᐊᒃ ᐊᐱᓄᒋᔥ ᑲᔦ ᐅᔥᑲᑎᔅ ᑲᑲᓄᔑᐧᐁ ᐊᓄᑭᐧᐃᑲᒥᑯᓐ, ᐯᔑᑯᑌᓯᐧᐃᓇᓐ ᑲᐧᐊᐧᐃᒋᑐᐧᐊᒡ, ᑭᑭᓄᒪᑎᑲᒥᑯᓐ, ᒪᔥᑭᑭᐧᐃᓂᓂᐧᐊᒃ ᑲᑕᓇᓄᑭᐧᐊᒡ ᑲᔦ ᑯᑕᑭᔭᓐ. ᐅᑭᒪᐧᐃᓐ ᑲᐸᒥᓇᒃ ᐊᐱᓄᒋᔥ ᑲᔦ ᐅᔥᑲᑎᔅ ᐧᐃᑐᑲᑫᐧᐃᓇᓐ (MCYS) ᐅᒋᑎᐸᐃᑲᑌᐧᐊᓐ ᐧᐃᑐᑲᑫᐧᐃᓇᓐ. ᒧᔥᑭᓀᐱᐃᑲᓇᓐ ᐃᔑᓂᔕᐃᑲᑌᐧᐊᓐ ᓂᐧᓴᔦᒃ ᒪᔭᑦ ᑲᑕᓇᓄᑲᑌᑭᓐ ᐧᐃᑐᑲᑫᐧᐃᓇᓐ ᐯᔑᒃ ᐃᐃᒪ ᒋᐅᒋᐧᐃᑐᑲᐧᐃᒡ:

1. ᐊᓪᑯᒪ ᐯᔑᑯᑌᓯᐧᐃᓐ ᐧᐃᑐᑲᑫᐧᐃᓐ
2. HANDS ᐯᔑᑯᑌᓯᐧᐃᓐ ᐧᐃᑐᑲᑫᐧᐃᓐ
3. ᐅᒃᐱᔪ

ᑫᒪ ᐯᔑᒃ ᐃᐃᒪ ᓂᓯᓐ ᑲᔭᑭᓐ ᐊᓂᔑᓇᐯᒃ ᑲᐅᒋᐧᐃᑐᑲᐧᐃᐧᑕ ᐧᐃᒋᐃᐧᐁᐧᐃᑲᒥᑯᓐ

1. ᑎᓕᑯ ᐊᓂᔑᓇᐯᒃ ᐯᔑᑯᑌᓯᐧᐃ ᐧᐃᑐᑲᑫᐧᐃᓐ
2. ᔕᐧᐊᓄᒃ ᓀᑲᐱᐊᓄᒃ ᐅᓐᑌᕆᐅ ᐊᓂᔑᓇᐯ ᒪᔥᑭᑭ ᐧᐃᒋᐃᐁᐧᐃᓐ (SOAHAC)
3. ᐧᐃᒋᐃᑎᐧᐃᓐ

ᐊᓐᑎ ᐃᓀᑫ ᑲᐅᒋᐧᐃᒋᐃᐧᑕ ᑲᔦ ᑫᐃᔑ ᓇᓇᑕᐧᐃᑭᑫᒋᑲᑌᒃ ᑲᒥᑲᓐ ᐅᐅᒪ. ᑲᐸᒥᓇᒧᐧᐊᒡ ᐊᓄᑭᐧᐃᓐ ᐅᑲᓇᓇᑲᒋᑐᓇᐧᐊ ᑲᐱᒋᓂᔕᑲᐃᑲᑌᓂᒃ ᑲᐧᑫᐧᑌᐧᐃᓐ ᐊᐧᐃᔭ ᒋᐧᐃᒋᐃᒡ (ᑲᐧᐃᓐ ᐧᐃᓐ ᒪᔥᑭᑭᐧᐃ ᓇᓇᑲᒋᒋᑫᐧᐃᓐ) ᑲᔦ ᑕᔥ ᐊᐱ ᑭᑭᔑᓇᓇᑲᒋᑐᐧᐊᒡ ᑕᐃᔑᓂᔕᐃᑲᑌ ᒋᐅᓀᒋᑲᑌᓂᒃ ᒋᒪᒋᐧᐃᑐᑲᐧᐃᒡ ᐊᐱᓄᒋᔥ ᑭᒋᐊᑯᓯᐧᐃᑲᒥᑯᒃ.

 

ᐅᐅᒪ ᐊᐧᐃᔭ ᒋᐅᒋᐧᐃᑯᐧᐃᒡ ᑌᓂᓂᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓂᒃ ᐊᓐᑕᐧᐁᑕᐧᑲᓐ ᒋᐅᓇᑌᒃ ᓇᑯᒥᑎᐧᐃᓐ ᑲᔦ ᑲᐊᐸᑕᒃ ᑲᐧᑫᐧᑌᐧᐃᓐ ᐊᐧᐃᔭ ᒋᐧᐃᒋᐃᒡ ᐅᑲᒧᔥᑭᓀᐱᐊᓇᐧᐊ ᑲᐧᐃᑕᓄᑭᒥᑎᐧᐊᒡ ᐧᐃᑐᑲᑫᐧᐃ ᐊᓄᑭᐧᐃᓂᒃ ᑲᐸᐸᒥᓯᐧᐊᒡ.

ᒪᔥᑭᑭᐧᐃᓂᓂᐧᐊᒃ ᑲᔦ ᐊᐱᓄᒋᔑ ᒪᔥᑭᑭᐧᐃᓂᓂᐧᐊᒃ ᐧᐃᓇᐧᐊ ᐅᑲᑭᒧᔥᑭᓀᐊᓇᐧᐊ ᑲᐧᑫᐧᑌᐧᐃ ᒪᓯᓇᐃᑲᓂ ᒋᔑᓂᔕᐊᒧᐧᐊᒡ ᐊᐱᓄᒋᔥ ᑭᒋᐊᑯᓯᐧᐃᑲᒥᑯᒃ.

ᐅᐅᐧᐁ ᐊᓄᑭᐧᐃᓐ ᑭᐅᓐᒋᑎᐸᐃᑲᑌ ᒪᔥᑭᑭᐧᐃ ᐅᑭᒪᐧᐃᓂᒃ (MOH)/TCLHIN.

 

ᑭᔥᐱᓐ ᐸᔑᒋᓭᒃ ᐅᐅᒪ ᒋᑭᐅᒋᐊᐸᒋᑐᔭᓐ ᑲᔦ ᑕᔥ ᒥᓴᐧᐁᑕᒪᓐ ᐅᐅᐧᐁ ᑎᓄ ᐧᐃᒋᐃᐧᐁᐧᐃᓐ ᒋᑭᐅᓇᑐᔭᓐ ᑲᓄᔥ ᑲᐅᑭᒪᐧᐃᒡ ᐊᓄᑭᐧᐃᓂᒃ ᐅᐅᒪ 416-813-2194.

ᑲᐧᑫᐧᑌᐧᐃᓇᓐ

 

ᓇᐧᑫᑕᒧᐧᐃᓇᓐ

 

ᐊᐧᐃᔭ ᓇᐱ ᐁᔑᐯᔑᑯᒡ ᑫᒪ ᐯᔑᑯᑌᓯᐧᐃᓂᒃ ᐅᑕᑭᒧᔥᑭᓀᐱᐊᓐ ᑲᐧᑫᐧᑌᐧᐃᓐ ᐊᐧᐃᔭ ᒋᐧᐃᒋᐃᒡ? ᑫᒪ ᑲᔦ ᑭᒋᔭᐊ ᑫᒪ ᑭᑭᓄᐊᒪᑫᐧᐃᓂ?

 

ᓂᐧᐃᑕᓄᑭᒪᒥᓐ ᑕᔑᑫᐧᐃᓂᒃ ᒪᔥᑭᑭᐧᐃ ᐊᓄᑭᐊᑲᓇᒃ ᐧᐃᓇᐧᐊ ᐁᒧᔥᑭᓀᐱᐃᑫᑕᒪᐧᐊᐧᐊᒡ ᑲᐃᓀᑕᒧᐧᐊᒡ ᒋᐧᐃᒋᐃᒥᒡ. ᐱᑯ ᐊᐧᐁᓀᓐ ᑕᑭᒧᔥᑭᓀᐱᐃᑫ ᑲᑲᓄᔑᐧᐁ ᐊᓄᑭᑕᒪᑫᒡ. ᑲᑭᓇ ᑭᑎᐸᒋᒥᑯᐧᐃᓇᓐ ᑕᐱᔥᑯ ᑫᓂᔑᐧᐊᐧᐊᐸᒥᑯᔭᓐ ᑲᔦ ᑲᐅᓇᑌᑭᓐ ᑭᐧᐊᐸᒥᑯᐧᐃᓇᓐ ᐧᐃᓐᑕᒪᐧᐊᑲᓂᐧᐃ ᒪᔭ ᑲᐊᓄᑭᑕᒪᐧᐃᒃ.

 

ᐊᓂᓐ ᑫᑐᑕᒪᓐ ᒋᒧᔥᑭᓀᐱᐃᑫᔭᓐ?

 

ᑭᔥᐱᓐ ᑕᔑᑫᐧᐃᓂᒃ ᒪᔥᑭᑭᐧᐃ ᐊᓄᑭᐊᑲᓐ ᐃᓇᓄᑭᔭᓐ ᑫᒪ ᐅᑭᒪᐧᐃᔭᓐ ᐃᐃᒪ ᐊᓄᑭᐧᐃᓂᒃ:

1. ᒥᓯᐧᐁ ᒧᔥᑭᓀᐱᐊᓐ ᑲᐊᓐᑕᐧᐁᑕᐧᑲᑭᓐ ᑲᐧᑫᐧᑌᐧᐃ ᒧᔥᑭᓀᐱᐃᑲᓇᓐ
2. ᐸᑭᑎᓂᑎᓱᐧᐃᓐ ᒋᑎᐸᒋᒪᑲᓂᐧᐃᒡ ᒧᔥᑭᓀᐱᐃᑲᓐ ᑲᔦ ᒧᔥᑭᓀᐱᐊᓐ, ᑲᐃᓇᑭᓱᒡ ᑭᓯᔅ ᑲᔦ ᒋᐅᔑᐱᐅᑎᓱᒡ ᐅᑕᑯᓯ ᑫᒪ ᐅᓂᑭᐃᑯᒪᒃ
3. ᐅᑎᐸᒋᒥᑯᐧᐃ ᒪᓯᓇᐃᑲᓇᓐ ᑲᐧᑫᐅᓐᑎᓇᓐ ᒋᑕᐧᑫᑭᓇᒪᓐ ᑲᐧᑫᐧᑌ ᒧᔥᑭᓀᐱᐃᑲᓂᒃ. ᑕᐱᔥᑯ ᑲᐃᓇᑎᓯᒡ ᑲᐧᑫᒋᒥᐧᐁᐧᐃᓇᓐ, ᓇᓇᑲᑕᐧᐁᑕᒧᐧᐊᐱᓀ ᓇᓇᑲᒋᐃᑯᐧᐃᓐ, ᑯᑕᑭᔭᓐ ᐸᑲᓐ ᑲᑭᐅᑎᓂᑲᑌᑭᓐ ᐅᑎᐸᒋᒥᑯᐧᐃᓇᓐ ᑲᑭᐱᔑᑲᑭᑫᑕᑯᓯᒡ, ᑲᑭᐱᔑ ᐧᐊᐧᐃᑐᑲᐧᐊᑲᓂᐧᐃᒡ ᐅᑎᐸᒋᒥᑯᐧᐃᓇᓐ.
4. ᑲᑭᓇ ᐃᔑᓂᔕᐊᓐ ᑲᑭᒪᐧᐊᑐᓇᒪᓐ ᒪᓯᓇᐃᑲᓇᓐ ᒪᔭ ᑲᐅᒋᐊᓄᑲᑌᒃ ᐧᐃᑐᑲᑫᐧᐃ ᐊᓄᑭᐧᐃᓐ.
5. ᐧᐃᑐᑲᑫᐧᐃ ᐊᓄᑭᐧᐃᓂᒃ ᑕᐅᒋ ᒪᒋᓂᔕᐃᑲᑌᐧᐊᓐ ᑭᑭᑐᐧᐃ ᒪᒋᐊᓯᒋᑲᓂᒃ ᒪᔭ ᑲᐅᒋᐊᓄᑲᑌᒃ ᑲᓂᐅᓇᑌᓂᒃ ᐊᐧᐃᔭᒃ ᒋᐊᓂᐧᐃᑐᐧᐃᐧᑕ.

ᑭᔥᐱᓐ ᐃᓇᐧᐁᒪᒡ ᑫᒪ ᑭᓐ ᓇᑕᐧᐁᑕᒪᓐ ᐧᐃᑐᑲᑯᐧᐃᓐ ᑲᓄᔥ ᑭᒪᔥᑭᑭᐧᐃᓂᓂᒻ ᑫᒪ ᑭᑕᔑᑫᐧᐃᓂᒃ ᑲᑕᓇᓄᑭᒡ ᐅᑲᑲᓄᔑᐧᐁ. ᐧᐃᓇᐧᐊ ᐅᑲᐅᓇᑐᓇᐧᐊ ᒋᒧᔥᑭᓀᐱᐃᑫᒪᐧᐃᐧᑲ.

 

ᐊᓐᑎ ᑫᐅᓐᑎᓇᒪᓐ ᑲᐧᑫᐧᑌᐧᐃᓐ ᐊᐧᐃᔭ ᒋᐧᐃᑐᑲᐧᐃᒡ ᒧᔥᑭᓀᐱᐃᑲᓇᓐ?

 

ᑲᐧᑫᐧᑌᐧᐃ ᐧᐃᒋᐃᑯ ᒧᔥᑭᓀᐱᐃᑲᓇᓐ ᑲᑭᒥᑲᓇᓐ ᐅᐅᒪ

 

ᐊᓐᑎ ᐁᐅᒋᐃᔑᓂᔕᐃᑲᑌᑭᓐ ᐊᐱᓄᒋᔥ ᑭᒋᐊᑯᓯᐧᐃᑲᒥᑯᒃ?

 

ᐃᐃᒪ ᐁᑕᑯ ᑭᑭᑐᐧᐃ ᒪᒋᐊᓯᒋᑲᓂᒃ 416-813-2189

 

ᓂᑕᓂᐅᓐᒋ ᐃᔑᓂᔕᐊᓐ ᓇ ᐃᐃᒪ ECHIN/ARMS?

 

ᑲᐧᐃᓐ ᓂᑐᑕᐱᓇᓯᒥᓐ ᐅᐅᒪ ᑲᐅᒋᐱᒋᓂᔕᐃᑲᑌᑭᓐ ECHIN/ARMS ᐊᐸᒋᑕᑲᓂᒃ.

 

ᐊᐧᐁᓀᓐ ᑫᑲᓄᓇᒃ ᐁᑭᒪᒋᓂᔕᐊᒪᓐ ᑲᐧᑫᐧᑌᐧᐃ ᒧᔥᑭᓀᐱᐃᑲᓐ?

 

ᒪᔭ ᑲᐊᓄᑲᑕᒃ ᑲᓂᐅᑕᐱᓂᐧᑕ ᑫᐧᐃᑐᑲᐧᐃᐧᑕ, ᑲᔅᑎᓐ ᓱᒡ ᐅᐅᒪ 416-813-6570 ᑫᒪ ᐱᐧᐊᐱᑯᒃ christine.sutch@sickkids.ca

 

ᐊᓂᓐ ᑫᑭᐅᒋ ᐅᓇᒋᑲᑌᒃ ᒋᓇᓴᐱᐧᐊᐸᒥᑯᔭᓐ?

 

ᑲᐊᓄᑭᑕᒪᐧᐃᒃ ᑫᒪ ᒪᔥᑭᑭᐧᐊᓄᑭᐊᑲᓐ ᐅᑲᒧᔥᑭᓀᐱᐊᓐ ᓇᓴᐱᐧᐊᐸᒥᒧᐧᐃ ᒧᔥᑭᓀᐱᐃᑲᓐ ᑭᑭᑐᐧᐃᓂᒃ ᒋᐅᒋᒪᒋᐊᓯᑐᒡ ᒪᔭ ᑲᐃᔑᓭᒃ ᒋᔑᓂᔕᐃᑲᑌᒃ ᑭᔥᐱᓐ ᐅᒋᐧᐃᑐᑲᑯᔭᓐ TMHS ᑫᒪ ᑲᐅᒋ ᐅᓇᒋᑲᑌᒃ ᒋᐧᐃᑐᑲᑯᔭᓐ ᑭᑭᑐᐧᐃᓂᒃ ᑌᓕᓕᓐᒃ. ᑲᓂᑫᓐ ᑭᔥᐱᓐ ᓇᓴᐱᐧᐊᐸᒥᑯᐧᐃ ᑲᐧᑫᐧᑌᐧᐃ ᒧᔥᑭᓀᐱᐃᑲᓐ ᑭᑲᔥᐳᓭᒃ ᐊᐧᐊᔑᒣ ᐯᔑᑯᐱᐳᓐ ᑲᑭᐃᔑᓂᔕᐃᑲᑌᑭᐸᓐ, ᐅᔥᑭ ᐸᑭᑎᓂᑎᓱᐧᐃᓐ ᒧᔥᑭᓀᐱᐃᑲᓐ ᑲᔦ ᑲᐧᑫᐧᑌᐧᐃ ᒧᔥᑭᓀᐱᐃᑲᓐ ᑕᐊᓐᑕᐧᐁᒋᑲᑌ ᒥᓇᐧᐊ ᒋᐱᒋᓂᔕᐃᑲᑌᒃ.

 

ᑕᑭᐃᔑᓭ ᓇ ᑭᒋᐊᓄᑭᐊᑲᓇᒃ ᒋᐅᒋ ᑕᔑᑕᒧᐧᐊᒡ ᑲᐅᓇᑌᒃ ᐧᐃᑐᑲᑫᐧᐃᓐ?

 

ᐁᐁ. ᐊᔭᐧᐊᓐ ᑲᐅᓇᑌᑭᓐ ᒋᐧᐊᐸᒥᑎᐧᐊᒡ ᐃᐃᒪ ᑕᔑᑫᐧᐃᓂᒃ ᒪᔥᑭᑭᐧᐃ ᐊᓄᑭᐊᑲᓇᒃ ᒋᓇᑭᔥᑲᑎᐧᐊᒡ ᐃᐃᒪ ᐊᐱᓄᒋᔥ ᑭᒋᐊᑯᓯᐧᐃᑲᒥᑯᒃ ᑲᑕᓇᓄᑭᐧᐊᒡ. ᐯᔑᐧᑲᓐ ᑕᔥ ᐅᑎᔑᐱᒥᓂᔕᐊᓇᐧᐊ ᑲᑐᒋᑲᑌᒃ ᐊᔕ ᑲᑭᐧᐃᓐᒋᑲᑌᒃ ᑲᐱᒋᓂᔕᐃᑲᑌᑭᓐ ᑲᐧᑫᐧᑌᐧᐃ ᒧᔥᑭᓀᐱᐃᑲᓇᓐ ᐊᐧᐃᔭ ᒋᐧᐃᒋᐊᑲᓂᐧᐃᒡ.

 

ᓂᒪᔥᑭᑭᐧᐃ ᐊᓄᑭᐊᑲᓂᓇᓂᒃ ᐅᒥᓴᐧᐁᑕᓇᐧᐊ ᐊᐧᐊᔑᒣ ᒋᓇᑲᒋᑐᐧᐊᒡ ᐅᑕᓄᑭᐧᐃᓂᐧᐊ ᑲᐧᐃᑕᓄᑭᒥᐧᑕ ᑭᒋᒪᔥᑭᑭᐧᐃᓂᓂᐧᐊᒃ. ᐊᓂᓐ ᑫᑐᑕᒪᓐ ᒋᑭᐅᒋ ᐅᓇᑐᔭᓐ ᐅᐅᐧᐁ ᑎᓄ ᐧᐃᑕᓄᑭᒥᑎᐧᐃᓐ?

 

ᒧᔥᑭᓀᐱᐊᓐ ᑲᔦ ᑭᑭᑐᐧᐃᓂᒃ ᐅᒋᒪᒋᐊᓯᑐᓐ ᒧᔥᑭᓀᐱᐃᑲᓇᓐ (ᔕᑲᓇᔑᒧᐧᐃᓂᒃ ᐁᑕ) ᐅᐅᒪ 416-813-2189. ᑭᔥᐱᓐ ᐧᑲᔭᐧᑫᓐᑕᓯᐧᐊᓐ ᐊᓂᓐ ᐁᑐᒋᑲᑌᒃ ᓂᑲᒥᐧᓀᑕᒥᓐ ᒋᐧᐊᐧᐃᓐᑕᒪᑯᔭᓐ. ᐱᑭᑭᑐᓐ ᐅᐅᒪ 416-813-2194.

 

ᐊᓂᓐ ᑫᑐᑕᒪᓐ ᐧᐃᑲᐧᑫᐧᑌᔭᓐ ᒋᐊᔭᑲᑌᒃ ᑭᑭᓄᐊᒪᑫᐧᐃᓐ?

 

ᒧᔥᑭᓀᐱᐊᓐ ᑲᔦ ᑭᑭᑐᐧᐃᓂᒃ ᐅᒋᒪᒋᐊᓯᑐᓐ ᒧᔥᑭᓀᐱᐃᑲᓇᓐ (ᔕᑲᓇᔑᒧᐧᐃᓂᒃ ᐁᑕ) ᐅᐅᒪ 416-813-2189. ᑭᔥᐱᓐ ᐧᑲᔭᐧᑫᓐᑕᓯᐧᐊᓐ ᐊᓂᓐ ᐁᑐᒋᑲᑌᒃ ᓂᑲᒥᐧᓀᑕᒥᓐ ᒋᐧᐊᐧᐃᓐᑕᒪᑯᔭᓐ. ᐱᑭᑭᑐᓐ ᐅᐅᒪ 416-813-2194.

 

ᐸᑭᑎᓂᑎᓱᐧᐃ ᒧᔥᑭᓀᐱᐃᑲᓐ

 

ᐊᓂᓐ ᑫᑐᑕᒪᓐ ᒧᔥᑭᓀᐱᐊᒪᓐ ᐸᑭᑎᓂᑎᓱᐧᐃ ᒧᔥᑭᓀᐱᐃᑲᓐ?

 

ᒧᔥᑭᓀᐱᐃᑲᓐ ᑲᒥᑲᓐ ᐅᐅᒪ. ᑭᑭᓇᐧᐊᒋᐱᐃᑲᑌ ᐊᓂᓐ ᑫᐃᔑᒧᔥᑭᓀᐱᐃᑲᑌᒃ ᑲᒥᑲᓐ ᐅᐅᒪ (ᔕᑲᓇᔑᒧᐧᐃᓂᒃ ᐁᑕ).

 

ᐊᓂᓐ ᒥᓂᑯᒃ ᑫᑭᐱᒥᐊᐸᑕᒃ ᐅᐅᐧᐁ ᐸᑭᑎᓂᑎᓱᐧᐃ ᒪᓯᓇᐃᑲᓐ?

 

ᐯᔑᑯᐱᐳᓐ ᐁᑕ ᑕᑭᐊᐸᑕᓐ ᐊᐱ ᑲᑭᐅᔑᐱᐅᑎᓱᔭᓐ ᑫᒪ ᐊᐱ ᐃᑭᑐᒡ ᑲᐧᐃᑐᑲᐧᐊᑲᓂᐧᐃᒡ ᒋᐳᓂᒋᑲᑌᓂᒃ ᐅᐸᑭᑎᓂᑎᓱᐧᐃ ᒪᓯᓇᐃᑲᓐ.

 

ᑫᔭᐱ ᑫᑯᓇᓐ ᓂᐧᐃᑲᐧᑫᐧᑌ ᐅᐧᐁ ᐅᒋ ᐸᑭᑎᓂᑎᓱᐧᐃ ᒪᓯᓇᐃᑲᓐ

 

ᒥᓯᐧᐁ ᐧᐊᐧᐃᓐᒋᑲᑌ ᐸᑭᑎᓂᑎᓱᐧᐃ ᒪᓯᓇᐃᑲᓐ ᑲᒥᑲᓐ ᐅᐅᒪ (ᔕᑲᓇᔑᒧᐧᐃᓂᒃ ᐁᑕ).

 

ᓂᑕᒻ ᑲᐧᐊᐸᒪᑲᓂᐧᐃᒡ ᐊᓂᓐ ᑫᓂᔑᐧᐃᑐᑲᐧᐃᒡ ᐅᑕᑯᓯ

 

ᐊᓐᑎ ᐁᑕᔑᑐᒋᑲᑌᒃ ᓂᑕᒻ ᑲᐧᐊᐸᒪᑲᓂᐧᐃᒡ ᐅᑕᑯᓯ?

 

ᓂᑕᒻ ᐧᐊᐸᒥᑯᐧᐃᓐ ᐃᐃᒪ ᑫᒪ ᐯᔓ ᑭᑕᔑᑫᐧᐃᓂᒃ ᑲᐃᔑᑕᐧᑲᒃ ᑭᑭᑐᐧᐃ ᐊᐸᒋᑕᑲᓐ. ᐃᐃᒪ ᐱᑯ ᐯᔑᒃ ᐸᑫᑲᒥᑯᓯᒃ ᑲᐃᔑᐱᓴᓀᑕᐧᑲᒃ ᑲᐃᔑᐱᓐᑎᑫ. ᑲᐧᐊᐸᓐᑕᓐ ᒋᐊᔭᒪᑲᒃ ᑎᐱ ᒪᓯᓇᑌᓯᒋᑲᓐ, ᒪᓯᓇᑭᓯᑲᓐ ᑫᒪ ᑲᔦ ᑲᐅᒋ ᑭᑭᑐᓇᓂᐧᐊᒃ.

 

ᐊᓐᑎ ᑫᑭᐅᒋ ᑫᒋᓇᐧᐁᑕᒪᓐ ᓂᐧᐊᐸᒥᑯᐧᐃᓐ ᑌᐧᐯ ᐊᐃᐧᔭᒃ ᒋᐅᒋ ᓄᑕᓯᐧᑲ, ᒋᐱᓴᓀᑕᐧᑲᒃ ᑲᔦ ᒋᐊᔭᐧᑲᒥᓂᑲᑌᒃ?

 

ᑭᓇᐧᐊ ᑕᑯ ᑲᐅᒋᐧᐊᐧᐃᑐᑲᐧᐃᒃ ᑲᐅᑭᒪᐧᐃᒡ ᑲᐅᓀᑕᓇᐧᐊ ᐊᐧᐁᓀᓐ ᑯᑕᒃ ᑫᑕᐧᑭᒡ ᑭᐧᐊᐸᒥᑯᐧᐃᓂᒃ. ᐱᓴᓐ ᐃᑯ ᑭᑎᓇᐧᐁᒪᑲᓇᒃ ᑲᔦ ᑕᔑᑫᐧᐃᓂᒃ ᑲᐊᔭᐧᐊᒡ, ᑕᐱᔥᑯ ᑭᑭᓄᐊᒪᑫᒃ, ᑯᑯᒻ ᑭᒥᔓᒻ, ᑭᒋᓂᑕᐧᐃᑭᒪᑲᓇᒃ.

 

ᐊᓂᓐ ᑕᔥ ᑭᔥᐱᓐ ᑭᒋᒪᔥᑭᑭᐧᐃᓂ ᓂᓯᑐᑕᓯᒃ ᓂᑎᔑᓭᐧᐃᓂ, ᓂᑕᔑᑫᐧᐃᓐ, ᑲᐅᑕᑲᓀᓯᔭᓐ ᑫᒪ ᓂᑎᔑᑭᐧᔐᐧᐃᓐ?

 

ᐊᐱ ᐊᓂᒪᒋᑕᓂᐧᐊᒃ ᑭᐧᐊᐸᒥᑯᐧᐃᓐ ᑫᒪ ᒣᐧᑲ ᐊᐱᐱᑯ ᐱᒥ ᓇᓇᑲᒋᐃᑯᔭᓐ, ᑭᐸᑭᓂᑎᑯ ᒋᐧᐃᓐᑕᒪᓐ ᑫᑯᓐ ᑲᑕᓀᑕᒥᐃᑯᔭᓐ. ᒣᐧᑲ ᑲᔦ ᑲᓂᐱᒥ ᐧᐊᐧᐁᓇᑌᓂᒃ ᐧᐃᑐᑲᑯᐧᐃᓐ, ᐅᑕᑯᓯᒃ ᑲᔦ ᑭᒋᒪᔥᑭᑭᐧᐃᓂᓂᐧᐊᒃ ᐅᓇᓴᐧᐊᒃ ᐁᐅᒋᑎᐸᐸᒋᑲᑌᒃ ᐃᔑᔭᐧᐃᓂᒃ, ᑫᐃᔑᐧᐃᑐᑲᐧᐃᒡ ᑲᔦ ᑲᐅᑕᑲᓀᓯᒡ.

 

ᐊᓂᓐ ᑕᔥ ᑫᔑᓭᒃ ᑭᔥᐱᓐ ᐊᓀᐧᑕᒪᓐ ᒪᔥᑭᑭᐧᐊᓄᑭᐊᑲᓐ ᑲᐧᐃᔑᐅᓇᑕᒪᐧᐃᔑᒡ?

 

ᐊᐱ ᐊᓂᔥᐧᑲ ᐧᐊᐸᒥᑯᔭᓐ, ᑕᐧᐊᐧᐃᓐᒋᑲᑌᐧᐊᓐ ᑫᑯᓇᓐ ᑲᐃᔑᐊᑕᐧᐁᑕᐧᑲᒃ ᒋᔑᐧᐃᑐᑲᑯᔭᓐ. ᑭᔥᐱᓐ ᓇᐁᓐᑕᓯᐧᐊᓐ ᑫᒪ ᐃᓀᑕᓯᐧᐊᓐ ᑲᐃᑭᑐᓇᓂᐧᐊᓐ, ᒥᐊᐱ ᑫᐧᐃᓐᑕᒪᓐ ᑫᒪ ᑲᐧᐃᑐᑲᐧᐃᒃ ᒋᐧᐃᓐᑕᒪᐧᐊᔦᒃ ᑭᒋᒪᔥᑭᑭᐧᐃᓂ. ᐃᔑᓭ ᒋᑲᓄᓇᒡ ᑲᐅᑭᒪᐧᐃᒡ ᐊᓄᑭᑕᒪᑫᐧᐃᓂᒃ ᒋᐧᐃᓐᑕᒪᐧᐊᒡ ᑫᑯᓐ ᑲᐃᔑᓇᐁᓐᑕᓯᐧᐊᓐ.

 

ᐊᓂᓐ ᑕᔥ ᑭᔥᐱᓐ ᒥᓂᑯᔭᓐ ᑎᐸᒋᒧᐧᐃᓐ ᑲᔦ ᑕᔥ ᐊᐧᓀᑕᒪᓐ ᑲᐃᔑᐱᐃᑲᑌᒃ?

 

ᑭᓐ ᑲᔦ ᑲᐧᐃᑐᑲᐧᐃᒃ ᐃᔑᓭ ᒋᐊᓐᑐᑕᒪᑫᔦᒃ ᒋᐸᔭᑌ ᓂᓯᑐᑕᒧᐃᑯᔦᒃ ᑫᑯᓇᓐ ᐃᐃᒪ ᑲᑭᐃᓇᒋᒥᑯᔭᓐ. ᑭᔥᐱᓐ ᐃᓀᑕᒪᓐ ᐁᐧᐊᓂᐱᐃᑲᑌᒃ ᑲᐃᓇᒋᒥᑯᔭᓐ, ᑭᑲᑲᓱᒥᑯ ᒋᐧᐃᓐᑕᒪᓐ. ᑭᒋᒪᔥᑭᑭᐧᐃᓂ ᑲᑭᐧᐊᐸᒥᒃ ᐧᐃᓐ ᐅᑲᓇᓇᑲᒋᑐᓐ ᑭᑎᐸᒋᒥᑯᐧᐃᓐ. ᑭᔥᐱᓐ ᑕᔥ ᐃᓀᑕᒧᐧᐊᒡ ᑕᐅᒋᑕᑯᐱᐃᑲᑌ ᐃᐃᒪ ᒋᓇᐧᑲᒃ ᐁᑭᒥᓄᐱᐃᑲᑌᒃ. ᑲᐧᐃᓐ ᐃᓇᑌᓯᓐ ᒋᑲᓯᐱᐃᑲᑌᑭᓐ ᐊᔕ ᐊᐸᓐ ᓂᑕᒻ ᑲᑭᐅᔑᒋᑲᑌᒃ ᑎᐸᒋᒧᐧᐃᓐ.

 

ᑕᑕᐧᐃᓭ ᓇ ᑫᑯᓇᓐ ᒋᑭᑲᐧᑫᐧᑌᔭᓐ?

 

ᐁᐁ. ᑭᑲᑲᓱᒥᑯ ᒋᑲᐧᑫᐧᑌᔭᓐ ᑫᑯᓇᓐ ᒣᐧᑲ ᑭᐧᐊᐸᒥᑯᔭᓐ ᑲᔦ ᑫᑯᓇᓐ ᑲᓂᓯᑐᑕᓯᐧᐊᓐ.

 

ᑎᐸᒋᒥᑯᐧᐃᓇᓐ

 

ᐊᓂᓐ ᒥᓂᑯᒃ ᑫᐱᐅᔭᓐ ᐊᐱ ᑲᑭᐃᔥᐧᑲᐧᐊᐸᒥᑯᔭᓐ ᒋᐱᒋᓂᔕᐊᒪᑯᔭᓐ ᑎᐸᒋᒧᐧᐃᓐ?

 

ᓂᑎᓇᒋᑫᒥᓐ ᒥᑕᓱᑭᔑᑲ ᑲᐃᔥᐧᑲᐧᐊᐸᒥᐧᑕ ᐅᑕᑯᓯᒃ ᐊᔕ ᒋᐱᒥᓂᔕᐊᒪᐧᐃᐧᑕ ᐅᑎᐸᒋᒥᑯᐧᐃᓂᐧᐊ.

 

ᐊᐧᐁᓀᓐ ᑫᐃᔑᓂᔕᐊᒪᐧᐊᑲᓂᐧᐃᒡ ᑎᐸᒋᒧᐧᐃᓂ?

 

ᑎᐸᒋᒧᐧᐃᓐ ᑕᐃᔑᓂᔕᐊᒪᐧᐊᐧᐊᒃ ᑲᑭᒧᔥᑭᓀᐱᐃᑫᑕᒪᑫᒡ ᑲᔦ ᒪᔥᑭᑭᐧᐃᓂ ᑭᔥᐱᓐ ᑕᑯᐱᐃᑲᓱᒡ ᐸᑭᑎᓂᑎᓱᐧᐃ ᒪᓯᓇᐃᑲᓂᒃ. ᑲᑭᓇ ᐊᐧᐃᔭᒃ ᑫᑭᐱᒋᓂᔕᐊᒪᐧᐃᐧᑕ ᑎᐸᒋᒧᐧᐃᓂ ᐊᓐᑕᐧᐁᑕᐧᑲᓐ ᒋᐅᔑᐱᐃᑲᓱᐧᐊᒡ ᐸᑭᑎᓂᑎᓱᐧᐃ ᒪᓯᓇᐃᑲᓂᒃ (ᔕᑲᓇᔑᒧᐧᐃᓂᒃ ᐁᑕ). ᑲᓇᐧᐊᐸᑕᓐ ᐅᐅᐧᐁ ᑭᑭᓇᐧᐊᒋᐱᐃᑲᓐ. ᑲᐧᐃᓐ ᓂᑎᔑᓂᔕᐊᒪᐧᐊᓯᒥᓐ ᑎᐸᒋᒧᐧᐃᓐ ᐅᓂᑭᐃᑯᒪᒃ.

 

ᐊᐧᐁᓀᓐ ᑫᑲᓄᓇᒃ ᑭᔥᐱᓐ ᑫᑯᓐ ᐧᐃᑲᐧᑫᐧᑌᔭᓐ ᑫᑯᓐ ᒥᑯᔥᑲᑌᑕᒪᓐ ᑲᑭᓇᓇᑲᒋᐃᑯᔭᓐ ᑫᒪ ᓂᑎᐸᒋᒥᑯᐧᐃᓐ?

 

ᑭᔥᐱᓐ ᑫᑯᓐ ᒥᑯᔥᑲᑌᑕᒪᓐ ᑲᓄᔥ ᒪᔭ ᑲᐅᒋᐊᓄᑭᑕᒪᐧᐃᒃ ᐁᑯ ᑕᔥ ᓂᑲᐱᑲᓄᓂᑯᒥᓐ ᑭᔥᐱᓐ ᐃᔑᐊᓐᑕᐧᐁᑕᐧᑲᒃ.

 


ᐅᐅᒪ ᑲᐃᓇᑯᓂᑲᑌᒃ ᑎᐱᓇᐧᐁ ᐅᒪᔥᑭᑭᐧᐃ ᑎᐸᒋᒧᐧᐃᓐ ᑲᑲᓇᐧᐁᑕᐧᑲᓂᒃ ᐅᓇᑯᓂᑫᐧᐃᓐ (PHIPA) ᐧᐁᓀᓇᒃ ᐃᓇᑌᓂ ᒋᐧᐊᐸᑕᐃᐧᑕ ᐅᑕᑯᓯᐧᐃ ᑎᐸᒋᒥᑯᐧᐃᓂᐧᐊ ᑲᑲᓇᐧᐁᒋᑲᑌᓂᒃ.

"PHIPA ᐸᑫᐱᐃᑲᓐ 51 (1) ᑲᐱᒥᓂᔕᐃᑲᑌᒃ ᐅᐅᒪ, ᐧᐁᓀᓇᒃ ᐃᓇᑌᓂ ᒋᐧᐊᐸᑕᐃᐧᑕ ᐅᑕᑯᓯᐧᐃ ᑎᐸᒋᒥᑯᐧᐃᓂᐧᐊ ᑲᑲᓇᐧᐁᒋᑲᑌᓂᒃ ᐊᑯᓯᐧᐃ ᑎᐸᒋᒥᑯᐧᐃ ᑲᓇᐧᐁᓐᒋᑫᐧᐃᓂᒃ "

ᐅᓐᑌᕆᐅ ᐅᑭᒪᐧᐃᓐ ᒪᒪᑲᑕᐱᑯᒃ ᑭᐅᑎᓂᑲᑌ (ᔕᑲᓇᔑᒧᐧᐃᓂᒃ ᐁᑕ)

ᑯᑕᑭᔭᓐ ᑫᑯᓇᓐ ᐧᐃᓇᓇᑕᐧᐃᑭᑫᑕᒪᓐ ᑎᐸᒋᒧᐧᐃᓇᓐ ᑲᔦ ᐅᑕᑯᓯ ᐅᑐᔑᐱᐃᑲᓱᐧᐃᓐ ᐃᔑᑭᑭᑐᓐ ᒪᔥᑭᑭᐧᐃ ᑎᐸᒋᒧᐧᐃᓇᓐ ᑲᑕᓇᓄᑲᑌᑭᓐ (ᔕᑲᓇᔑᒧᐧᐃᓂᒃ ᐁᑕ).