Facebook Pixel Code

ᐁᓇᓄᑭᓇᓂᐧᐊᒃ ᐅᐅᒪ

English

ᐅᐅᒪ ᐸᑫᐱᐃᑲᓂᒃ ᑲᑭᐅᑎᓇᓐ ᑲᐧᐃᓐᑌᑭᓐ ᐃᓇᓄᑭᑕᒪᑫᐧᐃᓇᓐ ᑲᐸᒥᓂᑫᑕᒪᑫᔭᒃ ᑲᔦ ᑫᐅᒋᐧᐃᑯᐱᑐᔭᓐ ᒪᒪᑲᑕᐱᑯᒃ ᑲᑕᐧᑫᑭᓂᑲᑌᑭᓐ ᑲᐊᐸᑕᑭᓐ ᒪᔥᑭᑭᐧᐃᓂ ᑲᒧᔥᑭᓀᐱᐊᒃ ᒋᐧᐃᑐᑲᐧᐃᒡ ᐊᐧᐃᔭ ᑲᔦ ᐸᑭᑎᓂᑎᓱ ᒧᔥᑭᓀᐱᐃᑲᓇᓐ.

ᒪᔥᑭᑭᐧᐃ ᐊᓄᑭᑕᒪᑫᐧᐃᓇᓐ
ᑭᑭᑐᐧᐃᓂᒃ ᑲᑲᓄᔑᐧᐁᐧᐃᓐ
ᓄᐱᒪᑲᒥᒃ ᑲᔭᑭᓐ ᑲᔦ ᐊᓂᔑᓇᐯ ᑕᔑᑫᐧᐃᓇᓐ ᐧᐃᑕᓄᑭᒥᑎᐧᐃᓐ

ᒪᔥᑭᑭᐧᐃ ᐊᓄᑭᑕᒪᑫᐧᐃᓇᓐ

ᐅᐅᒪ ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ ᑐᒋᑲᑌ ᐧᐁᐧᐁᓂ ᒋᔑᓭᒃ ᑲᔦ ᒋᑌᐱᓭᓂᒃ ᐅᐧᐃᑐᑲᑯᐧᐃᓂᐧᐊ ᐊᐱᓄᒋᔕᒃ ᐅᒪᒥᑐᓀᒋᑲᓇᐱᓀ ᐧᐃᒋᐃᑯᐧᐃᓂᐧᐊ ᒋᐊᐸᑕᒃ ᒪᓯᓇᑌᓯᒋᑲᓐ ᑲᔦ ᑯᑕᑭᔭᓐ ᑭᑭᑐᐧᐃ ᐊᐸᒋᑕᑲᓇᓐ ᐧᐁᐧᐃᑉ ᒋᔑᓭᓂᒃ ᑲᓂᐱᒥᐊᓄᑲᓂᐧᑕ ᓂᐧᔐᒃ ᐃᔑᑭᐧᔐᐧᐃᓂᒃ (ᔕᑲᓇᔑᒧᐧᐃᓐ ᑲᔦ ᐸᐧᑲᐃᔑᒧᐧᐃᓐ) ᑲᐧᐊᐸᒥᑯᐧᐊᒡ ᒪᔥᑭᑭᐧᐃᓂᓂᐧᐊᓐ. ᐅᐅᐧᐁ ᐊᓄᑭᐧᐃᓐ ᑭᐅᒋᐅᓇᑌ ᐊᐱᓄᒋᔑ ᑭᒋᐊᑯᓯᐧᐃᑲᒥᑯᒃ ᑫᐃᓇᓄᑭᒪᑲᒃ ᑲᑭᓇ ᑫᑯᓇᓐ ᑲᑭᓇᓇᑲᑕᐧᐁᒋᑲᑌᑭᓐ ᐊᓂᓐ ᐧᐁᐧᐁᓂ ᒋᐸᒥᓂᑫᒪᑲᒃ ᑲᔦ ᑭᑭᓄᒪᑫᐧᐃᓂᒃ ᐅᓐᒋᐧᐃᑕᓄᑭᒥᑎᒪᑲᓐ ᑐᕋᓐᑐ ᔪᓂᐳᕐᓯᑎ. ᑌᓕᓕᓐᒃ ᐊᓄᑭᐧᐃᓐ ᑭᐸᑭᑎᓂᑎᓱᒪᑲᓐ ᒋᑲᐧᑫ ᑎᐱᓭᑐᒡ ᒋᔑᐧᐃᑐᑲᑭᓐ ᑕᔑᑫᐧᐃᓇᓐ ᑲᓇᓄᑌᓭᑭᓐ ᑫᑭᐅᒋ ᐧᐃᑐᑲᑯᐧᐊᒡ ᐯᐸᑲᓐ ᐧᐃᑐᑲᑫᐧᐃᓇᓐ ᒋᐅᓐᑎᓇᒪᑲᓂᐧᐊᒃ. ᐃᐃᒪ ᑲᔦ ᒪᐧᐊᒡ ᒋᐧᐃᑕᓄᑭᒥᑎᓇᓂᐧᐊᒃ ᐅᐅᒪ ᑲᐅᒋᐸᐸᒥᓯᐧᐊᒡ, ᑎᐸᓐ ᑲᔦ ᐊᓂᔑᓇᐯᒃ.

ᒪᔥᑭᑭᐧᐃᓂ ᐅᓇᓇᑕᐧᐃᑭᑫᓂᒥᐧᐁᐧᐃᓐ

ᐊᐧᐊᔑᒣ 40 ᑕᔑᐧᐊᒃ ᐊᐱᓄᒋᔑ ᒪᒥᑐᓀᒋᑲᓇᐱᓀ ᒪᔥᑭᑭᐧᐃᓂᐧᐊᒃ ᑲᐅᒋ ᒪᒪᐧᐊᓄᑲᑌᒃ ᐊᐱᓄᒋᔑ ᒪᒥᑐᓀᒋᑲᓇᐱᓀ ᒪᔥᑭᑭᐧᐃᒋᐃᐁᐧᐃᓐ ᐃᐃᒪ ᑐᕋᓐᑐ ᔪᓂᐳᕐᓯᑎ, ᑕᑯ ᑲᔦ ᑲᐱᒥᐊᓄᑭᑕᒪᑫᐧᐊᒡ ᑲᔦ ᑯᑕᑭᔭᒃ ᐃᐧᓇᓱᐧᐊᒃ ᒪᔥᑭᑭᐧᐃ ᐊᓄᑭᐊᑲᓇᒃ. ᐯᐸᑲᓐ ᑎᓄᐧᐃ ᒪᒥᑐᓀᒋᑲᓇᐱᓀ ᐧᐃᑐᑲᑫᐧᐃᓇᓐ ᐃᓇᓄᑭᑕᒪᑫᐧᐊᒃ ᑕᐱᔥᑯ ᑲᐅᒐᓂᒥᓯᒡ ᐱᔑᔑᒃ ᑲᔦ ᑲᒥᑯᔥᑲᑎᓯᒡ, ᒥᔕᒣᓂᒧᐧᐃᓐ, ᑲᐱᒋᓂᑭᑫᑕᓱᓯᒃ, ᑲᐱᓯᔅᑫᓐᒋᑫᓯᒃ, ᑲᐊᔕᐧᐊᑌᓐᑕᓯᒃ ᑫᑯᓐ ᑲᔦ ᑲᑭᐧᐊᔥᐧᑫᔦᓐᑕᒃ.

ᑌᓕᓕᓐᒃ ᐊᓄᑭᑕᒪᑫᐧᐃᓐ ᐊᓐᑎ ᐱᑯ ᑕᑭᐅᒋᑌᐱᓂᑲᑌ ᐯᐸᑲᓐ ᑲᐧᑫᐧᑌᑕᒪᑫᐧᐃᓂᒃ: ᐊᐱᓄᒋᔑ ᑲᑲᓄᔑᐧᐁ ᐧᐃᑐᑲᑫᐧᐃᑲᒥᑯᓐ, ᑕᔑᑫᐧᐃᓂᒃ ᑭᒋᐊᑯᓯᐧᐃᑲᒥᑯᓐ, ᐅᔥᑲᑎᓯᐧᐃ ᑎᐸᑯᓂᑫᐧᐃ ᐧᐃᑐᑲᑫᐧᐃᓇᓐ, ᑭᑭᓄᒪᑫᐧᐃᓂᒃ ᑲᐊᐱᑕᒪᑫᐧᐊᒡ, ᑲᔦ ᑕᔑᑫᐧᐃᓂᒃ ᒪᔥᑭᑭᐧᐃᓂᐧᐊᒃ. ᐧᐊᐧᐁᓇᐸᒋᑲᑌᐧᐊᓐ ᐧᐃᑐᑲᑫᐧᐃᓇᓐ ᑲᐃᔑᐊᓐᑐᑕᒪᑲᓂᐧᐊᒃ ᑲᔦ ᒪᑭᐧᔕ ᑫᒋᐧᐊᒃ ᑕᓇᓇᑕᐧᐃᑭᑫᓂᒪᑲᓂᐧᐃ ᑫᒪ ᑲᔦ ᐊᑲᐧᐁ ᒋᐅᑲᑌᓂ ᒋᐱᒥ ᐧᐊᐧᐊᐸᒪᑲᓂᐧᐃᒡ, ᒪᔥᑭᑭᐧᐃᓂᓂᐧᐊᒃ ᒋᐅᒋ ᒪᒪᐧᐃ ᐅᓀᑕᒧᐧᐊᒡ ᑫᓂᔑᐧᐃᒋᐊᑲᓂᐧᐃᒡ ᑲᔦ ᒋᑕᔑᑕᒧᐧᐊᒡ ᐅᐧᐃᒋᐃᑯᐧᐃᓐ, ᒥᓯᐧᐁ ᒋᐅᒋ ᒪᒪᐧᐃᐊᓄᑲᑌᓂᒃ ᐧᐃᑐᑲᑯᐧᐃᓐ.

ᐊᐱ ᑭᐧᐊᐸᑕᒧᐧᐊᒡ ᐅᑎᐸᒋᒥᑯᐧᐃᓐ ᑲᐊᓐᑕᐧᐁᑕᐧᑲᓂᒃ ᒋᐧᐃᒋᐃᒡ, ᑕᓇᓇᑲᑕᐧᐊᐸᒋᑲᑌᓂ ᐅᑎᔑᓭᐧᐃᓐ ᑲᔦ ᐊᓂᓐ ᐁᐱᒋᐸᐸᔑᓭᓂᒃ ᒋᐊᓂᐧᐃᑐᑲᐧᐃᒡ ᑲᔦ ᑕᐅᓀᒋᑲᑌ ᐊᓂᓐ ᑫᓂᔑᐧᐃᑐᑲᐧᐃᒡ. ᐃᑭ ᑕᔥ ᑲᐸᐸᔑᓭᓯᓄᒃ ᒋᐧᐃᒋᐃᒡ, ᒥᓂᑯᒃ ᑫᐱᒥᐅᓇᒋᑲᑌᓂᒃ ᐱᒥᓭᓂ ᓂᔑᓐ ᐊᑯᓇᒃ ᓂᐅᑕᐧᐊᑌ. ᔕᑯᒡ ᑕᔥ ᑲᐸᐸᔑᓭᒃ ᒋᐧᐃᒋᐃᒡ ᐃᔑᐅᓇᑌ 24 ᐊᑯᓇᒃ 72 ᑎᐸᐃᑲᓐ ᐊᔕ ᒋᑲᐧᑫᐧᐃᒋᐃᒡ. ᑭᐧᐃᓐᒋᑲᑌ ᐁᐊᓐᑕᐧᐁᑕᐧᑲᒃ ᐊᐱᓄᒋᔥ ᑲᐊᓄᑲᓂᑯᒡ ᑫᒪ ᐅᒪᔥᑭᑭᐧᐃᓂᒪᓐ ᒋᐧᐃᒋᐧᐃᑯᒡ ᐊᐱ ᓂᑕᒻ ᐅᓇᑌᓂᒃ ᑫᓂᔑᐧᐃᒋᐃᒡ ᒋᑭᑫᓐᒋᑲᑌᓂᒃ ᒪᔭ ᑫᑯᓇᓐ ᑫᑭᐧᐃᒋᐃᑯᐸᓐ ᑕᐱᔥᑯ ᐃᐃᒪ ᑲᐅᑕᑲᓀᓯᒡ, ᑲᐃᔑᑭᐧᔐᒡ, ᑲᔦ ᑲᑭᑲᐧᑫᐧᑌᓇᓂᐧᐊᒃ ᑫᐃᔑᐧᐃᒋᐃᒡ, ᑫᒋᓇᒡ ᒋᐧᐃᓐᑌᑭᓐ ᑫᐃᔑᐧᐃᒋᐊᑲᓂᐧᐃᒡ ᑲᔦ ᐊᓐᑎ ᑫᐅᒋ ᐧᐃᒋᐊᑲᓂᐧᐃᒡ ᒪᔥᑭᑭᐧᐃ ᐧᐃᒋᐃᑯᐧᐃᓂᒃ. ᒥᓇᐧᐊ ᑕᔥ ᐊᐸᓐ ᐅᑲᓂᑕᔑᓐᑕᓇᐧᐊ ᐃᔥᐧᑲ ᐧᐊᐸᒪᑲᓂᐧᐃᒡ ᑲᔦ ᑕᐅᔑᒋᑲᑌ ᑎᐸᒋᒧᐧᐃ ᐅᔑᐱᐃᑲᓐ ᒋᐧᐸ 15 ᑕᓱᑯᓐ ᑲᔥᐳᓭᒃ. ᑯᑕᑭᔭᒃ ᒪᔭ ᑲᒪᔥᑭᑭᐧᐃ ᐊᓄᑭᐧᐊᒡ ᐅᑲᐅᒋ ᑲᓄᓇᐧᐊᓐ ᐅᐅᐧᐁ ᑲᐃᓇᓄᑭᐧᐊᒡ ᒪᒥᑐᓀᒋᑲᓇᐱᓀᐧᐃ ᐧᐃᑐᑲᑫᒃ ᐃᐃᒪ ᑭᑭᑐᐧᐃᓂᒃ, ᐃᒣᓪ ᑫᒪ ᐸᒃᔅ ᒪᒋᐊᓯᒋᑲᓂᒃ ᑭᔥᐱᓐ ᑫᑯᓐ ᐧᐃᑭᑫᑕᒧᐧᐊᒡ ᑫᒪ ᑲᔦ ᒥᓇᐧᐊ ᐧᐃᐅᓇᒋᑲᑌᒃ ᒪᓯᓇᑌᓯᒋᑲᓂᒃ ᑲᐅᒋᐧᐊᐸᒥᒡ ᐅᑕᑯᓯ ᑫᒪ ᐊᓐᑕᐧᐁᑕᒧᐧᐊᒡ ᐊᐧᐊᔑᒣ ᑫᑯᓐ ᑭᑫᓐᒋᑫᐧᐃᓐ ᑫᒪ ᐊᓱᔥᑲᒪᑫᐧᐃᓐ.

ᑲᓂᐅᓇᒋᑲᑌᓂᒃ ᑫᔑᐱᒥᐧᐃᒋᐊᑲᓂᐧᐃᒡ

ᐊᐱ ᐊᓂᐅᓇᒋᑲᑌᓂᒃ ᑫᔑᐱᒥᐧᐃᒋᐊᑲᓂᐧᐃᒡ ᐅᑕᑯᓯ, ᒥᐊᐧᐁ ᐯᔑᐧᑲᓐ ᑫᐱᒥ ᐅᓇᒋᑫᒡ ᑕᓱᑭᓯᔅ ᑫᐱᒥ ᑲᑲᓄᓇᒡ ᑲᐅᒋᐸᒥᓇᒧᐧᐊᒡ ᒪᒥᑐᓀᒋᑲᓇᐱᓀ ᐧᐃᑐᑲᑫ ᐊᓄᑭᐧᐃᓇᓐ ᑕᐱᔥᑯ ᑭᑭᓄᒪᑎᐧᐃᑲᒥᑯᒃ ᑲᐅᒋᐧᐃᒋᐃᐧᑕ, ᑲᐃᔑᑲᓇᐧᐁᑕᑯᓯᐧᐊᒡ, ᑫᔑᐱᒥᐧᐃᒋᐃᐧᑕ ᐊᐱᓄᒋᔕᒃ ᐅᓂᑭᐃᑯᓐ ᑲᓄᑎᓂᑫᐧᐊᓄᑭᓂᒡ, ᒪᔥᑭᑭᐧᐃ ᐊᓄᑭᐊᑲᓇᒃ, ᒋᐅᒋ ᐱᒥᐧᐊᐧᐃᓐᑕᒪᑎᐧᐊᒡ ᑫᑯᓇᓐ ᐯᐸᑲᓐ ᐅᑎᔑᓭᐧᐃᓂᐧᐊ ᑲᐅᒋᐧᐃᒋᐃᐧᑕ ᒪᔥᑭᑭᐧᐃ ᐧᐃᒋᐃᑯᐧᐃᓂᒃ ᑲᔦ ᑲᐃᔑᓭᑭᓐ ᑫᑯᓇᓐ ᐅᑕᔑᑫᐧᐃᓂᒃ. ᑫᑕᔑᑕᒧᐧᐊᒡ ᑲᔦ ᑲᐃᔑᐯᔑᑯᒡ ᐅᔥᑲᑎᔅ ᑲᐃᔑᐧᐁᐱᓯᒡ ᐅᑎᓇᑎᓯᐧᐃᓐ ᑲᔦ ᐅᑎᓀᑕᒧᐧᐃᓐ, ᑲᑭᐃᔑᒥᑲᒪᐧᐃᒡ ᐁᓇᐱᓀᒡ, ᑫᓂᔑᐧᐃᑐᑲᐧᐃᒡ. ᐅᑲᑕᔑᑕᓇᐧᐊ ᑲᔦ ᑲᑭᓇ ᑯᑕᑭᔭᓐ ᑲᐃᔑᐸᐸᒥᓯᒪᑲᑭᓐ ᐅᐅᒪ ᑎᓄᐧᐃ ᐧᐃᒋᐃᑯᐧᐃᓂᒃ ᑫᓂᔑᐱᒪᓄᑲᑌᓂᒃ.

ᓂᑕᒻ ᑲᔦ ᑲᒧᒋᓇᓇᑕᐧᐃᑭᑫᒋᑲᓂᐧᐃᒡ ᐅᑕᑯᓯ ᐅᑐᒋᐧᐃᒋᐃᑯᓇᐧᐊ ᒋᐅᒋ ᐧᐃᒋᐃᑯᐧᐊᒡ ᑲᐃᔑᓴᓇᑫᑕᐧᑲᓂᒃ ᑲᐃᔑ ᑲᐧᑫᐧᐊᐧᐃᑐᑲᐧᐊᐧᐊᒡ ᑲᐃᓇᐱᓀᓂᒡ. ᑭᑭᑐᐧᐃᓂᒃ ᑌᓕᓕᓐᒃ ᐅᑭᒋᐊᐸᒋᑐᓇᐧᐊ ᐊᓄᑭᐊᑲᓇᒃ ᒋᐅᒋ ᓂᓯᑕᐧᐁᑕᒧᐧᐊᒡ ᐊᓂᓐ ᐁᔑᐱᒥᐧᐃᑐᐧᐊᒡ ᐅᑕᓄᑭᑕᒪᑫᐧᐃᓂᐧᐊ ᑕᔑᑫᐧᐃᓂᒃ ᑫᐅᒋᐧᐃᒋᐃᑯᐧᐊᒡ ᑲᓇᓇᑕᐧᐃᐃᐧᑕ ᒥᑕᔥ ᐃᐃᒪ ᐁᐅᓐᑎᓇᒧᐧᐊᒡ ᐧᐃᓐᑕᒪᑫᐧᐃᓇᓐ ᑫᐊᐸᒋᑐᐧᐊᒡ ᐅᒪᔥᑭᑭᐧᐃ ᐧᐃᑐᑲᑫᐧᐃᓂᐧᐊᒃ. ᑲᑭᓇ ᑲᓂᐅᓇᒋᑲᑌᓂᒃ ᑫᔑᐱᒥᐧᐃᒋᐊᑲᓂᐧᐃᒡ ᐊᐧᐃᔭ ᑎᐸᐸᒋᑲᑌᐧᐊᓐ ᑲᐃᓇᐱᓀᐧᐊᒡ ᒋᔑᐱᒥᐧᐃᑐᑲᐧᐃᐧᑕ. ᑭᑭᑐᐧᐃᓂᒃ ᑲᐅᒋ ᑲᓄᓂᑎᓇᓂᐧᐊᒃ ᑲᔦ ᐃᐃᒪ ᒋᐅᒋ ᐧᐃᑕᓄᑭᒥᐧᑕ ᐊᓂᔑᓇᐯᒃ, ᒥᐃᒪ ᐁᐅᒋ ᑭᒋᓇᐸᑕᒃ ᑭᑭᑐᐧᐃ ᐊᐸᒋᑕᑲᓐ ᒋᐅᒋ ᑲᓄᓂᐧᑕ ᑭᒋᐊᓄᑭᐊᑲᓇᒃ ᑲᔦ ᑕᔑᑫᐧᐃᓇᓐ ᑲᐃᔑᑕᐧᐊᒡ ᑲᐅᒋᐧᐃᑐᑲᐧᐃᐧᑕ.

ᑭᑭᓄᒪᑫᐧᐃᓐ

ᒪᓯᓇᑌᓯᒋᑲᓂᒃ ᑲᐅᒋᒪᐧᐊᒋᐃᑎᓇᓂᐧᐊᒃ ᑲᔦ ᑯᑕᑭᔭᓐ ᒪᒪᑲᑕᐱᑯ ᐊᐸᒋᑕᑲᓇᓐ ᑭᑭᑐᐧᐃᓐ ᑲᐅᒋᐊᓄᑭᒪᑲᒃ ᐯᐸᑲᓐ ᐃᓇᐸᒋᒋᑲᑌᐧᐊᓐ ᐁᐅᒋ ᐸᑭᑎᓂᑲᑌᒃ ᒋᑭᑭᓄᒪᑲᓂᐧᐊᒃ, ᑕᑯ ᒋᐱᒥᑭᑭᓄᒪᑲᓂᐧᐊᒃ ᐊᓄᑭᐧᐃ ᑫᑯᓇᓐ ᑲᔦ ᑲᐅᒋ ᐱᒥ ᑲᓇᐧᐁᒋᑲᑌᑭᓐ ᐊᓄᑭᐧᐃᓇᓐ. ᑭᑭᑐᐧᐃᓂᒃ ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ ᑲᐅᒋᐸᒥᓂᑲᑌᒃ ᐊᐱᓄᒋᔑ ᑭᒋᐊᑯᓯᐧᐃᑲᒥᑯᒃ ᐃᓇᓄᑭᒪᑲᓐ ᐁᑭᑭᓄᐊᒪᐧᐃᐧᑕ ᑲᒪᔥᑭᑭᐧᐃ ᑭᑭᓄᐊᒪᐧᐃᐧᑕ ᓇᓇᑲᑕᐧᐁᑕᒧᐧᐊᐱᓀᐧᐃᓐ ᑲᔦ ᐊᓂᓐ ᐁᓇᓄᑲᒋᑲᑌᒃ ᐅᐅᐧᐁ ᐧᐃᑐᑲᑫᐧᐃᓐ, ᑲᔦ ᐅᒋ ᐱᒥ ᑭᑭᓄᐊᒪᐧᐊᐧᐊᒃ ᑭᒋᐊᓄᑭᐊᑲᓇᒃ ᐱᑯ ᐊᓐᑎ ᐧᐊᓴ ᑲᑕᓇᓄᑭᐧᐊᒡ.

ᑭᐅᔑᓯᒋᑲᑌᐸᓐ ᒋᑕᐧᑲᒃ ᐅᐱᒥ ᑭᑭᓄᒪᑯᐧᐃᓂᐧᐊ ᑕᔑᑫᐧᐃᓂᒃ ᑲᑲᓄᔑᐧᐁ ᐊᓄᑭᐊᑲᓇᒃ ᐊᓂᓐ ᐊᐧᐊᔑᒣ ᑫᓂᔑ ᑲᔥᑭᑐᐧᐊᒡ ᐅᑎᓇᓄᑭᑕᒪᑫᐧᐃᓂᐧᐊ ᑕᐱᔥᑯ ᑲᓇᓇᑐᑭᑫᓂᒪᑲᓂᐧᐃᒡ ᐅᑕᑯᓯ ᑲᐃᔑᐱᑭᔑᔭᑭᓐ ᑕᔑᑫᐧᐃᓇᓐ, ᑲᔦ ᑲᑭᐃᔑ ᑭᑫᓂᒪᒡ ᑭᒋᒪᔥᑭᑭᐧᐃᓂ ᐁᓇᐱᓀᓂᒡ ᑲᐱᓇᓇᑲᒋᐊᒡ ᐊᐱᓄᒋᔕᓐ ᑲᓇᓇᑲᑕᐧᐁᑕᒧᐧᐊᐱᓀᓂᒡ ᑲᔦ ᐊᓂᓐ ᑫᔑᐱᒥᐧᐃᑐᑲᐧᐊᐧᐊᒡ ᒪᔥᑭᑭᐧᐃ ᐊᓄᑭᐊᑲᓇᒃ. ᒥᑕᔥ ᐃᐃᒪ ᐁᐅᒋ ᐱᒥᓂᔕᐃᑲᑌᑭᓐ ᑲᑭᐃᔑ ᑭᑫᓂᒥᐧᑕ ᑲᓇᓇᑲᒋᐃᐧᑕ ᐅᑕᑯᓯᒃ ᑲᔦ ᒪᓯᓇᐃᑲᓇᓐ ᑲᐧᐃᒋᐃᐧᐁᒪᑲᑭᓐ ᑭᑭᓄᒪᑫᐧᐃᓂᒃ, ᑭᑭᑐᐧᐃᓂᒃ ᑌᓕᓕᓐᒃ ᑭᐅᒋᐅᓇᒋᑲᑌᐸᓐ ᒋᐅᒋ ᐱᒥ ᐸᐸᑭᑎᓂᑲᑌᒃ ᑭᑭᓄᒪᑫᐧᐃᓐ. ᑲᔦ ᑕᔥ ᑫᐅᒋ ᐧᐃᒋᐃᑎᐧᐊᒡ ᐅᐱᒥ ᑭᑭᓄᐊᒪᑯᐧᐃᓂᐧᐊᒃ ᑭᒪᒥᐧᓇᒋᑲᑌᐧᐊᓐ, ᐁᐅᒋ ᐧᐊᐧᐃᓐᑕᒪᑎᐧᐊᒡ ᑫᑯᓇᓐ, ᐁᑭᑭᓇᐧᐊᒋᑐᑕᒧᐧᐊᒡ ᒋᐅᒋ ᑭᑭᓇᐧᐊᐸᑕᐃᐧᐁᐧᐊᒡ ᑲᔦ ᒪᓯᓇᑌᓯᒋᑲᓇᓐ ᐊᐸᒋᒋᑲᑌᐧᐊᓐ. ᐅᐅᒪ ᑲᐅᒋ ᒪᒪᐧᐃ ᑭᑭᓄᒪᑫᓇᓂᐧᐊᒃ ᐯᐸᑲᓐ ᑫᑯᓇᓐ ᑭᑭᓄᒪᑫᓇᓂᐧᐊᓐ ᒪᔥᑭᑭᐧᐃ ᑫᑯᓇᓐ ᑕᐱᔥᑯ ᑲᐅᒐᓂᒥᓯᒡ ᐊᐱᓄᒋᔥ, ᐅᔥᑲᑎᔅ ᒪᓀᓐᑕᒧᐧᐊᐱᓀᐧᐃᓐ, ᐯᔑᑯᑌᓯᐧᐃᓐ ᒪᒪᐧᐃ ᐧᐃᑐᑲᓱᐧᐃᓐ, ᑯᑕᑭᐃᑯᐧᐃᓐ ᑲᔦ ᐱᔑᐧᑲᒋᑐᑕᑯᐧᐃᓐ ᑲᔦ ᓇᓇᑲᑕᐧᐁᑕᒧᐧᐊᐱᓀ ᓇᓇᑲᒋᐃᑯᐧᐃᓐ. ᐅᓄ ᑭᑭᓄᒪᑫᐧᐃᓇᓐ ᑭᐃᔑᐅᓇᒋᑲᑌᐧᐊᓐ ᒋᑭᑭᓄᒪᑲᓂᐧᐊᒃ ᓂᑕᒻ ᑲᓂᐅᔥᑲᓄᑭᐧᐊᒡ ᑫᒪ ᐱᓂᔥ ᑲᐃᔥᐱᑭᑫᑕᒧᐧᐊᒡ ᒪᔥᑭᑭᐧᐃ ᐊᓄᑭᐧᐃᓇᓐ ᑫᑭᐅᒋ ᐱᒥᐧᐃᑐᑲᑯᐧᐊᒡ ᐅᒪᔥᑭᑭᐧᐃ ᐊᓄᑭᑕᒪᑫᐧᐃᓂᐧᐊᒃ ᐯᐸᑲᓐ ᐧᐊᓴ ᑲᑕᑕᓇᓄᑭᐧᐊᒡ ᑲᔦ ᑲᐃᔑᐱᒥ ᐧᐃᒋᑐᐧᐊᒡ ᐯᐸᑲᓐ ᐃᔑᓭᐧᐃᓇᓐ.

ᒥᓇᐧᐊ ᑕᔥ ᑕᓱᑕᐧᐊᑌ ᒪᒥᑐᓀᒋᑲᓇᐱ ᒪᔥᑭᑭᐧᐃᓂᓂᐧᐃ ᐊᓄᑭᐧᐃ ᑕᔑᓐᒋᑫᐧᐃᓐ ᒪᓯᓇᑌᓯᒋᑲᑌ ᐊᐱᓄᒋᔑ ᑭᒋᐊᑯᓯᐧᐃᑲᒥᑯᒃ ᒥᓯᐧᐁ ᐅᓐᑌᕆᐅ ᐁᐅᒋ ᒪᒪᐧᐃ ᑲᓇᐧᐊᐸᑕᒧᐧᐊᒡ ᒪᓯᓇᑌᓯᒋᑲᓂᒃ ᐅᐅᒪ ᑲᑕᐧᑭᐧᐊᒡ ᒋᐅᒋᑲᓇᐧᐊᐸᑕᒧᐧᐊᒡ. ᐅᑯ ᒪᔥᑭᑭᐧᐃᓂᐧᐊᒃ ᐧᐊᓴ ᐯᐸᑲᓐ ᑕᔑᑫᐧᐃᓇᓐ ᑲᑕᓇᓄᑭᐧᐊᒡ ᐅᑐᒋ ᑲᓇᐧᐊᐸᑕᓇᐧᐊ ᐅᓄ ᑲᒪᓯᓇᑌᓯᒋᑲᑌᑭᓐ ᑭᑭᓄᐊᒪᑫᐧᐃ ᑫᑯᓇᓐ ᐅᑲᑭᑌᐱᓇᓇᐧᐊ CME Section 1 (ᒪᒪᐧᐃ ᑭᑭᓄᒪᑯᐧᐃ ᐃᔑᒋᑫᐧᐃᓇᓐ) ᑯᕃᑎᑦᔅ. ᐊᐧᐊᔑᒣ ᐧᐃᓇᓇᑕᐧᐃᑭᑫᑕᒪᓐ ᐅᐅᒪ ᑲᐅᒋ ᒪᒪᐧᐃ ᑲᓇᐧᐊᐸᒋᑲᑌᑭᓐ ᑭᑭᓄᐊᒪᑫᐧᐃᓇᓐ, ᑲᓄᔥ ᐧᓚᕋ ᓇᔥ ᐅᐅᒪ laura.nash@sickkids.ca ᑫᒪ ᐅᐅᒪ ᐃᔑᑲᓄᔥ 416-813-7520.

ᒥᓇᐧᐊ ᑯᑕᒃ ᓂᔑᓐ ᑭᑭᓄᐊᒪᑫᐧᐃ ᐅᓇᒋᑫᐧᐃᓐ ᑲᐧᐃᑲᐧᑫᑌᐱᓂᑲᑌᒃ ᑭᑭᑐᐧᐃᓂᒃ ᑌᓕᓕᓐᒃ ᒋᐅᓇᑕᒪᐧᐃᐧᑕ ᑫᓂᐊᓄᑭᐧᐊᒡ ᒪᒥᑐᒧᒋᑲᓇᐱᓀᐧᐃ ᒪᔥᑭᑭᐧᐃᓂᐧᐊᒃ ᒋᓂᑕ ᐊᐸᒋᑐᐧᐊᒡ ᒪᓯᓇᑌᓯᒋᑲᓂ ᒋᐅᒋ ᐧᐊᐸᒪᐧᐊᒡ ᐅᑕᑯᓯᓐ. ᑲᑭᒪᒋᓭᒃ 2005 ᑲᑭᓇ ᓇᓇᑲᑕᐧᐁᑕᒧᐧᐊᐱᓀᐧᐃ ᑭᑭᓄᐊᒪᑫᐧᐃᓂᒃ ᑲᐧᐃᒪᔥᑭᑭᐧᐃᓂᓂᐧᐃᐧᐊᒡ ᑐᕋᓐᑐ ᔪᓂᐳᕐᓯᑎ ᐊᑕᐧᐁᑕᑯᓯᐧᐊᒃ ᓂᐧᔕ ᒪᓯᓇᑌᓯᒋᑲᓂᒃ ᒋᐅᒋ ᑭᑭᓄᒪᐧᐃᐧᑕ ᑌᓕᓕᓐᒃ. ᑭᑭᓄᒪᐧᐊᑲᓇᒃ ᐅᑲᑭᐅᒋ ᑲᓇᐧᐊᐸᒪᐧᐊᓐ ᑭᒋᒪᔥᑭᑭᐧᐃᓂᓂᐧᐊᒃ ᑲᑐᑕᒧᐧᐊᒡ ᑲᓇᓇᑲᒋᐊᐧᐊᒡ ᐊᐱᓄᒋᔕᓐ ᑲᔦ ᐅᑎᓇᐧᐁᒪᑲᓇᓐ ᑲᔦ ᒋᐅᒋ ᐸᐸᒥᓯᐧᐊᒡ ᑭᑲᑲᓄᓂᐧᑕ ᑭᐱᒥ ᓇᓇᑲᒋᐃᐧᑕ. ᒥᑕᔥ ᐁᑐᒋᑲᑌᒃ ᐅᐅᒪ ᒋᐅᒋ ᐧᐃᒋᐃᐧᑕ ᑭᑭᓄᒪᐧᐊᑲᓇᒃ ᑌᓕᓕᓐᒃ ᐅᒋᐸᑭᑎᓂᑲᑌ ᓂᓱᑭᓯᔅ ᑲᔦ ᓂᑯᐧᑕᓱᑭᓯᔅ ᐱᒥ ᑭᑭᓄᒪᑫᐧᐃᓐ. ᓂᐸᑭᑎᓇᒥᓐ ᑲᔦ ᑯᑕᑭᔭᓐ ᒪᔥᑭᑭᐧᐃ ᑭᑭᓄᒪᐧᐊᑲᓇᒃ, ᐊᓄᑭᑕᒪᑫᐧᐃ ᑭᑭᓄᒪᐧᐊᑲᓇᒃ, ᓇᓇᑲᑕᐧᐁᑕᒧᐧᐊᐱᓀ ᐧᐃᑐᑲᑫ ᐊᓄᑭᐊᑲᓇᒃ, ᐊᐱᓄᒋ ᑲᔦ ᐅᔥᑲᑎᔅ ᑲᐱᒥᐧᐃᑐᑲᐧᐊᒡ ᑲᔦ ᑯᑕᑭᔭᒃ ᐊᐱᓄᒋᔑ ᐧᐃᑐᑲᑫᐧᐃ ᐊᓄᑭᐊᓇᒃ ᑫᐧᐃᓇᐧᐊ ᐅᐅᒪ ᒋᐊᐸᒋᑐᐧᐊᒡ ᒋᑲᓇᐧᐊᐸᑕᒧᐧᐊᒡ ᑫᑯᓇᓐ ᑲᒪᓯᓇᑌᓯᒋᑲᑌᑭᓐ ᑫᒪ ᐧᐃᑭᑫᑕᒧᐧᐊᒡ ᒋᐧᐃᒋᐃᑯᐧᐊᒡ ᑲᐃᓇᓄᑭᐧᐊᒡ.


ᑭᑭᑐᐧᐃᓂᒃ ᑲᑲᓄᔑᐧᐁᐧᐃᓐ

ᒣᐧᑲ ᐅᐅᐧᐁ, ᓇᓇᓐ ᐊᐱᓄᒋᔕᒃ ᐯᔑᒃ ᐅᓐᒋᐃᓇᐱᓀ ᐁᓇᓇᑲᑕᐧᐁᓐᑕᒧᐧᐊᐱᓀᒡ ᒋᐧᐸ 18 ᑭᑕᓱᐱᐳᓀᒡ. ᒪᐧᐊᒡ ᐃᔑᒥᑯᔥᑲᑌᑕᐧᑲᓐ ᒪᑭᐧᔕ 85 ᐳᓭᓐᑦ ᐅᑯ ᐅᔥᑲᑎᓴᒃ ᑲᐧᐃᓐ ᐧᐁᐧᐃᑉ ᐊᓂᐧᐃᑐᑲᐧᐊᑲᓂᐧᐃᓯᐧᐊᒃ. ᑲᐃᓇᒋᒧᒪᑲᒃ ᑲᓇᑕ ᓇᓇᑲᑕᐧᐁᑕᒧᐧᐊᐱᓀᐧᐃᓐ ᐧᐃᑐᑲᑫᐧᐃᓐ ᑲᐊᓄᑲᑕᒧᐧᐊᒡ (2009), ᐅᓐᑌᕆᐅ ᐊᑭᒃ ᐊᐱᒋ ᓄᑌᓭᐧᐃᓇᐧᑲᓐ ᐅᐅᐧᐁ ᑎᓄᐧᐃ ᐧᐃᑐᑲᑫᐧᐃᓐ ᒋᐅᒋ ᓇᑕᒪᐧᐃᐧᑕ ᓇᓇᑲᑕᐧᐁᑕᒧᐧᐊᐱᓀᐧᐃᓐ ᑲᐃᓇᐱᓀᐧᐊᒡ, ᐧᐁᑎ ᒪᐧᐊᒡ ᐃᔑᓄᑌᓭ ᐧᐃᑐᑲᑫᐧᐃᓐ ᐧᐊᓴ ᑭᐧᐁᑎᓄᒃ ᑲᔭᑭᓐ ᑕᔑᑫᐧᐃᓇᓐ. ᑭᐃᓇᒋᒧ ᐅᑭᒪᐧᐃᓐ ᑲᐸᒥᓇᒃ ᑭᐧᐁᑎᓄᒃ ᐊᓄᑭᐧᐃᐸᐸᒥᓯᐧᐃᓇᓐ, ᑭᐧᐁᑎᓄᒃ ᐅᓐᑌᕆᐅ ᐊᔭᐧᐊᓐ 145 ᐧᐁᒥᑎᑯᔑ ᐅᑌᓇᐧᐊᓐ, 106 ᐊᓂᔑᓇᐯ ᑕᔑᑫᐧᐃᓇᓐ, ᑲᔦ 10 ᑲᐅᒋ ᐸᐱᑭᔑ ᑕᔑᑫᐧᐃ ᑎᐯᓐᒋᑫᐧᐃᓇᓐ. ᐊᓇᐧᐃᓐ ᐊᐧᐃᔭᒃ ᑲᑕᐧᐊᒡ ᑭᐧᐁᑎᓄᒃ ᐅᓐᑌᕆᐅ ᐸᑭ ᐃᓀᑕᐧᑲᓐ ᒪᒪᐤ ᑲᑕᔑᓇᓂᐧᐊᒃ, ᐃᓇᒋᒧᒪᑲᓐ ᑲᓇᑕ ᑕᔑᑫᐧᐃᓂᒃ ᒪᔥᑭᑭᐧᐃ ᐊᓄᑭᐧᐃᓂᒃ ᑲᐧᑫᒋᒥᐧᐁᐧᐃᓇᓐ ᑲᑭᑲᐧᑫᒋᒥᐧᑕᐸᓐ (2002), ᐅᔥᑲᑎᓴᒃ ᑲᑯᑕᑭᐃᑯᐧᐊᒡ ᐅᓇᓇᑲᑕᐧᐁᑕᒧᐧᐊᐱᓀᐧᐃᓂᐧᐊ ᓄᐱᒪᑲᒥᒃ ᑭᐧᐁᓄᑎᒃ ᐊᓂᔑᓇᐯ ᐃᔥᑯᓂᑲᓇᓐ ᑲᑕᐧᐊᒡ ᐸᑎᐧᓇ ᐃᔑᐧᐁᐱᓯᐧᐊᒃ ᐊᐧᐊᔑᒣ ᐁᐅᒋᓴᓇᑭᓭᐧᐊᒡ ᑲᑭᐧᐃᒋᐃᓯᐧᑲ ᐯᔓ ᑲᐃᔑᑕᐧᐊᒡ.

ᐊᐱᓄᒋᔑ ᑭᒋᐊᑯᓯᐧᐃᑲᒥᒃ ᑭᑭᑐᐧᐃᓂᒃ ᑌᓕᓕᓐᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ ᐃᐃᒪ ᑐᕋᓐᑐ ᐧᐁᐧᐁᓂ ᐊᓄᑭᒪᓐ ᑲᐅᒋ ᓇᓇᑲᒋᐊᑲᓂᐧᐃᐧᐊᒡ ᓇᓇᑲᑕᐧᐁᑕᒧᐧᐊᐱᓀᐧᐃᓂᒃ, ᑲᐅᓇᑌᓂᒃ ᑫᓂᔑᐧᐃᑐᑲᐧᐃᐧᑕ ᑲᔦ ᑭᑭᓄᒪᑫᐧᐃᓐ ᑲᐊᓄᑲᑌᒃ ᐅᐅᐧᐁ ᑲᐊᐸᑕᒃ ᐅᔥᑭ ᒪᒪᑲᑕᐱᑯ ᐊᐸᒋᑕᑲᓐ ᐊᔕ ᒥᑕᓱᐱᐳᓐ ᑲᐅᒋᐱᒥᐊᐸᑕᒃ. ᐅᐅᐧᐁ ᐊᐸᒋᑕᑲᓐ ᐅᐅᒪ ᑲᐅᒋᐧᐃᑐᑲᐧᐃᐧᑕ ᐅᐧᐃᑕᓇᐧᐊ ᐁᑭᒋᓀᑕᒧᐧᐊᒡ ᑭᐧᐁᑎᓄᒃ ᐅᓐᑌᕆᐅ ᑲᔦ ᐃᔥᑯᓂᑲᓇᓐ ᑲᑕᐧᐊᒡ ᑲᐃᔑᓭᓯᓂᒃ ᒋᑭᑌᐱᓇᒧᐧᐊᒡ ᐊᐱᓄᒋᔑ ᑲᑲᓄᔑᐧᐁ ᐧᐃᑐᑲᑫᐧᐃᓂ. ᒥᑕᔥ ᑲᔦ ᑲᑭᐱᔑᑲᑭᑫᑕᒧᐧᐊᒡ ᐅᓄ ᑎᓄ ᐧᐃᑐᑲᑫᐧᐃᓇᓐ ᑕᑯ ᑲᔦ ᓇᓇᑲᒋᐃᐧᐁᐧᐃᓇᓐ ᐊᐱᒋ ᐁᓄᑌᓭᑭᓐ ᑲᔦ ᐁᑭᒋᐊᓐᑕᐧᐁᒋᑲᑌᑭᓐ. ᐅᐅᐧᐁ ᒣᐧᑲ ᑲᐊᓄᑲᑌᒃ ᑭᑭᑐᐧᐃᓂᒃ ᑲᑲᓄᔑᐧᐁᐧᐃᓐ ᑲᑭᐅᓐᒋ ᐅᓇᒋᑲᑌᒃ ᒋᐅᒋ ᐧᐃᒋᒋᑲᑌᒃ ᑲᐃᔑᓇᓄᑌᓭᒃ ᐧᐃᑐᑲᑫᐧᐃᓐ.

ᑭᐃᓇᑯᓂᑲᑌ ᐅᓄ ᐧᐃᑐᑲᑫᐧᐃ ᐊᓄᑭᐧᐃᓇᓐ ᒋᓇᓐᑭᓂᑲᑌᑭᓐ ᐱᓂᔥ ᑫᑭᐅᒋ ᑌᐱᓭᐧᐊᒡ ᐊᓄᑭᐊᑲᓇᒃ ᒋᐊᓂᔑ ᐧᐊᐧᐃᑐᑲᑫᐧᐊᒡ ᒋᐊᓄᑲᓇᐧᐊᒡ ᓇᓇᑲᑕᐧᐁᑕᒧᐧᐊᐱᓀᐧᐃᓐ ᑲᐃᓇᐱᓀᐧᐊᒡ ᐊᐱᓄᒋᔕᒃ ᐊᓄᑭᐧᐃᑲᒥᑯᓐ ᑲᔦ ᒋᐊᓂ ᓇᑲᒋᑐᐧᐊᒡ ᐅᑕᓄᑭᑕᒪᑫᐧᐃᓂᐧᐊ ᑲᔦ ᑫᐅᒋ ᐧᐃᒋᐃᑯᐧᐊᒡ ᐅᐅᒪ ᑲᐧᐃᒋᐃᐧᑕ. ᒋᐱᒥᓂᔕᐃᑲᑌᒃ ᐅᐅᐧᐁ ᐅᓇᒋᑲᓐ ᑫᐃᓇᓄᑭᐧᐊᒡ ᐯᔓ ᐧᐃᑕᓄᑭᒪᑲᓂᐧᐃᐧᐊᒃ ᓂᑲᓐ ᑲᓇᓇᑕᐧᐃᑭᑫᒋᑫᐧᐊᒡ ᐯᐸᑲᓐ ᑲᑕᑕᓇᓄᑭᐧᐊᒡ ᑲᑲᐧᑫᒋᒋᑲᑌᑭᓐ ᒋᒥᓄᓭᑭᓐ ᐊᓄᑭᐧᐃᓂᒃ ᒋᐊᐸᑕᑭᓐ, ᐊᓄᑭᑕᒪᑫᐧᐃᓐ ᒋᒥᓄᓭᒃ, ᒪᔥᑭᑭᐧᐃ ᐧᐃᒋᐃᐧᐁᐧᐃᓐ, ᑲᐱᒥᑲᓇᐧᐁᒋᑲᑌᒃ ᐧᐁᐧᐁᓂ ᒋᐊᓂᒥᓄᔥᑲᒪᑲᒃ ᑲᐃᔑᓄᑌᓭᑭᓐ ᐊᐱᓄᒋᔥ ᑲᑲᓄᔑᐧᐁ ᐊᓄᑭᑕᒪᑫᐧᐃ ᐊᓄᑭᐧᐃᑲᒥᑯᓐ ᑲᔦ ᑲᐊᓄᑭᑕᒪᐧᐃᐧᑕ.

ᑲᐧᐃᓐ ᑭᐊᔭᑲᑌᓯᓄᐧᐊᓐ ᐅᓄ ᑲᑲᓄᔑᐧᐁ ᐧᐃᑐᑲᑫᐧᐃᓇᓐ ᑲᔦ ᑲᐅᒋ ᓇᓇᑕᐧᐃᑭᑫᑕᑯᓯᐧᐊᒡ ᐊᓂᓐ ᐁᓇᐱᓀᐧᐊᒡ ᐧᐁᑎ ᓄᐱᒪᑲᒥᒃ ᑲᔭᑭᓐ ᐧᐃᒋᐃᐧᐁᐧᐃᑲᒥᑯᒃ ᐁᑯ ᑕᔥ ᑲᐊᐱᓯᓇᐧᑲᑭᓐ ᑕᔑᑫᐧᐃᓇᓐ ᑲᐧᐃᓐ ᓄᑯᒻ ᒋᑭᐱᓂᑫᒪᑲᒃ ᐊᔕ ᐊᐸᓐ ᑲᑭᑲᔥᑭᒋᑲᑌᒃ ᐅᐅᐧᐁ ᑎᓄ ᐊᐸᒋᑕᑲᓐ ᒋᐅᒋ ᐊᓄᑲᑌᒃ ᑲᑭᒋᓄᑌᓭᒃ ᐊᓄᑭᐧᐃᓐ. ᓂᑲᐧᑫᑲᔥᑭᑐᒥᓐ ᑭᑭᑐᐧᐃᓂᒃ ᑲᑲᓄᔑᐧᐁ ᐊᓄᑭᑕᒪᑫᐧᐃᓐ ᐧᐁᐧᐁᓂ ᒋᐱᒥᐊᓄᑭᒪᑲᒃ ᑫᑭᐅᒋ ᐱᒥ ᐧᐃᑐᑲᑯᐧᐊᒡ ᐊᐱᓄᒋᔕᒃ ᑲᔦ ᐅᑎᓇᐧᐁᒪᑲᓂᐧᐊ ᐯᔓ ᒋᐅᒋ ᐧᐃᑕᓄᑭᒥᐧᑕ ᑕᔑᑫᐧᐃᓇᓐ ᑲᔭᑭᓐ ᑲᔦ ᑲᑲᓄᔑᐧᐁ ᐊᓄᑭᐧᐃᓇᓐ ᑲᐸᒥᓇᒧᐧᐊᒡ. ᐅᐅᒪ ᓂᓇᐧᐃᑦ ᓂᑐᑎᓇᒪᑫᒥᓐ ᑲᐃᔑᓇᓄᑌᓭᑭᓐ ᑲᑲᓄᔑᐧᐁ ᐧᐃᑐᑲᑫᐧᐃ ᑫᑯᓇᓐ ᑲᑭᓇ ᐅᔥᑲᑎᓴᒃ ᒋᐅᒋ ᐧᐃᑐᑲᑯᐧᐊᒡ.

ᐊᐧᐊᔑᒣ ᐧᐃᑭᑫᑕᒪᓐ ᑫᒪ ᑫᑯᓐ ᐧᐃᑲᐧᑫᐧᑌᔭᓐ, ᑲᓄᔥ ᑫᕃᓐ ᑭᑭᑐᐧᐃᓂᒃ ᐅᐅᒪ 416-813-1670 ᑫᒪ ᐱᐧᐊᐱᑯ ᐅᔑᐱᐊᒪᑫᐧᐃᓂᒃ ᐅᐅᒪ karen.fennell@sickkids.ca


ᓄᐱᒪᑲᒥᒃ ᑲᔭᑭᓐ ᑲᔦ ᐊᓂᔑᓇᐯ ᑕᔑᑫᐧᐃᓇᓐ ᐧᐃᑕᓄᑭᒥᑎᐧᐃᓐ

ᐊᐱᓄᒋᔑ ᐃᑯᓯᐧᐃᑲᒥᑯᒃ (SickKids) ᑭᑭᑐᐧᐃᓂᒃ ᑲᑲᓄᔑᐧᐁᐧᐃᓐ ᐊᓄᑭᑕᒪᑫᐧᐃᓐ ᑲᔦ ᓇᓇᑲᑕᐧᐁᑕᒧᐧᐊᐱᓀᐧᐃ ᐊᓄᑭᐧᐃᓐ ᑲᑕᓇᓄᑭᐧᐊᒡ ᐸᑭᑎᓂᑎᓱᐧᐊᒃ ᐧᐁᐧᐁᓂ ᒋᔑᓇᐧᑲᒃ ᐊᓄᑭᑕᒪᑫᐧᐃᓇᓐ, ᐊᐱᓄᒋᔕᒃ ᑲᔦ ᐅᔥᑲᑎᓴᒃ ᐅᑲᑲᓄᔑᐧᐁ ᐧᐃᑐᑲᑯᐧᐃᓂᐧᐊ ᐊᓂᔑᓇᐯ ᑕᔑᑫᐧᐃᓇᓐ ᑲᑕᐧᐊᒡ ᑲᔦ ᑲᐃᔑᓄᐱᒥᐧᐁᑕᐧᑲᑭᓐ ᑕᔑᑫᐧᐃᓇᓐ ᐅᓐᑌᕆᐅ ᑲᔦ ᑲᓇᑕ ᑲᔭᑭᓐ. ᑲᐧᐃᓐ ᐃᑯ ᐁᑕ ᐃᐃᒪ ᑫᒋᐧᐊᒃ ᒪᓯᓇᑌᓯᒋᑲᓂᒃ ᑕᐅᒋ ᑲᑲᓄᓇᓯᐧᐊᒃ ᑲᐧᐃᑐᑲᐧᐃᐧᑕ ᐊᐱᓄᒋᔕᒃ ᑲᔦ ᐯᔑᑯᑌᓯᐧᐃᓇᓐ, ᑕᑯ ᑲᔦ ᑲᐅᒋᐱᒥᐊᐧᓴᐸᒥᐧᑕ ᑕᔑᑫᐧᐃᓂᒃ ᑲᑲᓄᔑᐧᐁ ᐊᓄᑭᐧᐃᓂᒃ, ᐃᐃᒪ ᐱᑯ ᑲᔦ ᑕᐅᒋᐅᔑᓯᑕᒪᐧᐊᑲᓂᐧᐃᐧᐊᒃ ᑭᐧᓀᔥ ᒋᐅᒋ ᐱᒥᐧᐃᒋᐃᐧᑕ ᐅᑕᔑᑫᐧᐃᓂᐧᐊᒃ ᑲᔭᓂᑭᓐ ᐧᐃᑐᑲᑫᐧᐃᓇᓐ ᑲᔦ ᐊᓄᑭᐊᑲᓇᒃ.

ᐊᐱᒋ ᑭᒋᓀᑕᐧᑲᓐ ᒋᐊᓂᔑᐱᒥ ᐊᓄᑲᑕᒪᒃ ᐊᓂᓐ ᐊᐧᐊᔑᒣ ᑫᑭᐊᓄᒋ ᐱᒋᓂ ᓂᓯᑕᐧᐁᒋᑲᑌᓂᑭᓐ ᑲᐃᔑᐱᒪᑎᓯᐧᐊᒡ ᑲᔦ ᐅᒪᒪᐧᐃ ᒪᔥᑲᐧᐃᓯᐧᐃᓂᐧᐊ ᑕᔑᑫᐧᐃᓇᓐ ᐃᐃᒪ ᑲᐧᐃᓐᒋᑲᑌᒃ ᒋᔑᐸᑭᑎᓂᑲᑌᒃ ᑲᑲᓄᔑᐧᐁ ᐧᐃᑐᑲᑫᐧᐃᓐ ᑲᔦ ᐊᓂᓐ ᑫᐃᔑᐅᓇᒋᑲᑌᓂᒃ ᐅᐱᒥᐧᐃᒋᐃᑯᐧᐃᓂᐧᐊ, ᐯᑭᔥ ᑲᔦ ᒋᐅᒋ ᓇᓇᑲᑕᐧᐊᐸᒋᑲᑌᑭᓐ ᑕᔑᑫᐧᐃᓂᒃ ᑲᐃᔑᑭᒋᓀᑕᒧᐧᐊᒡ ᑲᐅᒋᒪᔥᑲᐧᐊᑎᓯᐧᐊᒡ ᒥᓇ ᐅᑕᓂᔑᓂᓂᐧᐃ ᐱᒪᑎᓯᐧᐃᓂᐧᐊ. ᑲᐅᒋ ᐧᐊᐧᐃᑕᓄᑭᒥᑎᐧᐊᒡ ᒪᐧᐊᒋᐃᑎᐧᐃᓇᓐ (ᑕᑯ ᐊᓄᑭᑕᒪᑫᐧᐃᓇᓐ ᑫᐃᔑᓇᐧᑲᑭᓐ), ᑭᑭᓄᐊᒪᑫᐧᐃᓇᓐ, ᑲᓄᒋᑫᑕᒪᑫᐧᐃᓇᓐ, ᒋᓇᐧᑫᒋᑲᑌᑭᓐ ᑲᓇᓇᑕᐧᐃᑭᑫᒋᑲᑌᑭᓐ ᑭᔥᐱᓐ ᑌᐱᓇᒧᐧᐊᐧᑫᓐ ᐧᐃᑐᑲᑫᐧᐃᓇᓐ ᒥᐅᓄ ᒪᔭ ᑲᑭᑕᐸᑕᑭᓐ ᒋᐅᒋᐊᔭᓂᑫ ᐊᓄᑲᑌᑭᓐ, ᑲᔦ ᒋᔑᐱᒪᓄᑲᑌᒃ ᑲᓂᓇᑭᐅᒪᑲᑭᓐ ᐧᐃᑕᓄᑭᒥᑎᐧᐃᓇᓐ ᑲᔦ ᑲᓂᒥᓄᓭᑭᓐ ᐧᐃᑐᑲᑫᐧᐃᓇᓐ.

ᐊᐧᐊᔑᒣ ᐧᐃᑭᑫᑕᒪᓐ ᑫᒪ ᑫᑯᓐ ᐧᐃᑲᐧᑫᐧᑌᔭᓐ, ᑲᓄᔥ ᑫᕃᓐ ᑭᑭᑐᐧᐃᓂᒃ ᐅᐅᒪ 416-813-1670 ᑫᒪ ᐱᐧᐊᐱᑯ ᐅᔑᐱᐊᒪᑫᐧᐃᓂᒃ ᐅᐅᒪ karen.fennell@sickkids.ca